كمبيوتر أركايد
كتبهاmohammad habash ، في 18 تموز 2007 الساعة: 21:16 م
كمبيوتر أركايد !!
يعني مافي بني ادم عندو كمبيوتر إلا وما جرب يلعب ولو لمرة واحدة على الإقل ومهما كانت اللعبة تكون لابد من التجربة للمرة الاولى على الاقل .. بس التجربة بتختلف حسب عمر المستخدم للكمبيوتر وزمان او بالاحرى العصر اللي هو فيو
يعني بتذكر بمنتصف التسعينات ولما كان الويندوز 95 منتشر بشكل كبير كانت الالعاب جدا سخيفة مقارنة بألعاب الجيل الحالي من حيث الذكاء الاصطناعي اللي فيها والغرافيكس الضعيف جدا جدا ومع ذلك كانت الاجيال تنسى حالها ساعات وساعات بشكل جنوني قدام الشاشة الصغيرة .
بتذكر أولى الالعاب اللي كانت منتشرة أيام سنة 2000 كانت التومب رايدر الجزء الثالث منها والنيد فور سبيد الجزء الثاني البعيد كل البعد عن شي اسمو واقع !!
ما بنكر أول ما جبت الكمبيوتر كنت ألعب عليه ليل نهار وخاصة الالعاب الموجودة فيو لانو ما كنت بعرف نزل شي عليه ولا حتى كان عندي سيديات
مرت الايام الطويلة واختلفت تجربتي مع ألعاب الكمبيوتر بحيث صرت أختار الالعاب بعناية ولما أبلش بلعبة اضل عليها حتى أختمها وخاصة ان كانت معصلجة معك بشي مرحلة بذكر مرة شفت ديمو لعبة عجبني على قناة ايطالية مختصة بألعاب الكمبيوتر والبلاي ستيشن والنيتندو … اسم اللعب soldier of fortune الجزء الاول … نزلت ع مركز السيليكون في حلب والكائن في عبارة اسكندرون في الجميلة وحصلت على نسخة من اللعبة بملبغ 35 ليرة ( لو سمعني أحد العاملين بالشركة رح ينتحر اكيد !! لانو هنن بيهلكوا ليصمموا اللعبة وبالاخير عم تنباع بهالسعر !! )
نزلتها ع الجهاز وبلشت العبها لكن طلعت روحي مع هاللعبة وما كنت أعرف السبب وافكر من جهازي المناضل ذو المعالج 633 ورامات 128 بعد التحديث والله بالصدفة اكتشفت انو النسخة عندي مضروبة وعم تعلق كل شوي ومع كل هالتعليقات خلصت نص اللعبة تقريبا ووجدت فيها متعة كبيرة لانها مو حيالله لعبة عادية
خلصت من هاللعبة وبنفس الوقت كانت خبرتي بشكل عام الكمبيوترية و الانترنتية عم تتوسع ومع مرور الزمن صار وقتي ورغبتي بالالعاب ضعيفة جدا ولو ببعض فواصل صغيرة من أحد ألعاب سباق السيارات الشهيرة من سلسلة نيد فور سبيد وطبعا كنت أنزل نسخة لاخوي الصغير والعب نادرا فيها ومع ذلك ختمت بمساعدة ابي احيانا احلى جزئين من اللعبة
هلء مالي أي مراق بألعاب الكمبيوتر يمكن لانو قعدتي كلها يا تصميم يا انترنت يا بحبشة بالويندوز والريجستري وهالامور هي لدرجة اني قرأت آلاف الصفحات من الكتب متعلقة بهالامور هي اللي بتشكل هوس دائم عندي وحب البحث لحتى أصل لمرحلة انو خلص ما ضل شي تبحث عنو وخصوصا في الانترنت ما رح اوصل لهالمرحلة لانو مهما حاولنا بالبحث عم نوصل لجزء بسيط كتير من تريليونات البايتات من البيانات في الانترنت
خبرونا عن تجربتكم مع ألعاب الكمبيوتر وهل لازلتم بتلعبوا وكيف بتختاروا ألعابكم او بتقضوا وقتكم ع النت غالبو …
ـــــــــــــــــــــــــــــــــــــــــــــــــــــــــ
التصنيفات : هلوسات شخصية | السمات:هلوسات شخصية
أرسل الإدراج | دوّن الإدراج
يوليو 19th, 2007 at 19 يوليو 2007 1:15 م
يلعن شيطانك, لعبة سولدجر أوف فورتشن كانت أكتر الألعاب التي شعرت بندم بلعبها, يمكن كانت اظهاراتها كتير قوية, بس كانت غير مناسبة لأعمارنا أبداً, لأنو مناظر الدبح والقتل والأشلاء كانت فعلاً مرعبة, وكنت حس بعد ما ألعبها إني مرضان, بعدين حذفتها, ويمكن من بعدها منعوا ظهور ألعاب تقوم بإظهار الأشلاء, أو حتى الدم, متل ألعاب كول أوف دوتي ولعبة ميدال أوف آنر, يلي ما بتفجر الانسان أو بتظهر أشلائه.
أكتر لعبة حبيتها وما بعتقد رح يطلع متلها كانت لعبة ماكس باين, وكمان لعبة فار كراي, وما زلت حتى الآن بشتري ألعاب تبعاً لذوقي, وطبعاً اختيار اللعبة بيتعلق أولاً باسم الشركة…
عندك أكتيفيشن (اظهارات عادية لكن لعبة ذات تحكم رائع وسلسة)
إيدوس (لعبة ممتعة لكن تحكمها صعب قليل, واظهارات عادية)
إي إيه (روعة اشتريها فوراً)
وطبعاً في كم اسم من أسماء المطورين نسيانهن..
سلام
يوليو 19th, 2007 at 19 يوليو 2007 7:27 م
والله يا علوش انا اللي عجبني هو الاكشن الكبير باللعبة والرعب الموجود وخاصة الاشلاء الطايرة
عندك طريقة مميزة باختيار الالعاب
سلام